Askatasunari dei egiten dio Xoriñoa Kaiolan kantak, Kalakan hirukoteak argitaratu berri duen abestiak. Jamixel Bereau, Xan Errotabehere eta Bixente Etchegaray musikariek osaturiko taldeak pandemia garaiko libertate egarriari erreferentzia garbia egin dio bideoklip formatuan estreinatu duen kantan.

Eragin asiatikoak ezohikoak dira hirukoaren konposaketetan, baina oso nabariak azken proposamen honetan. Hala, taldekideek beraiek “electro-world music” gisa deskribatu dute baliatutako estiloa.

Bestalde, ohiko ahotsak eta danbor hotsak ez ezik, txalaparta, txirula, panderoa edota Indiako harmoniuma ere entzun daitezke Xoriñoa Kaiolan-en.