Kontzeptu eta estilo anitzeko artista da Izaro. Halaxe erakutsi zuen bere debut albumean (Om, 2016) eta baita ospetsu bihurtu zuen bigarren diskoan (Eason, 2018) ere. Ingelesa, euskara eta gaztelania erabiliz; pop-a, folk-a, mediterraneoaren itzala edo melodia urratu eta geldoa enplegatuz; bere kontzertuetan belaunaldi ezberdinetako ikus-entzuleak bildu ohi ditu.

2020rako hirugarrena dakar: Limones En Invierno. “Kolore, usain, tenperatura eta kontraste kitzikagarriak” jasotzen omen ditu, eta “Ggun eguzkitsuak argitzen dituzten argi zitrikoak ekarriko ditu, baina baita neguko errekak estaltzen dituzten behe-lainoak ere”.

Disko berria aurkezteko lehen-lehen kontzertua Mexiko Hirian emango du urtarrilaren 31n. Segidan, Latinamerikara eta espainiar estatura helduko den bira hasiko du, eta Euskal Herrian martxoaren 21ean egingo du geldialdia. Donostiako Kursaalen izango da, larunbata, 20:00etan.

Sarrerek prezio bakarra dute, 25€, eta urriaren 25etik aurrera salgai www.kursaal.eus webgunean.