Euskal Herriko Musika Bulego Elkarteak, bertako artista, talde edo musika proiektuek iaz burututako lana saritzea izan du xede sariketaren bosgarren edizio honetan.

107 proposamenen artean, 8 kidek osaturiko epaimahaiak honako 8 izen hauentzat ebatzi ditu sariak: Ander Tellería, Arineketan, Belako, Brais Novoa Loira, Izaro, Noa & The Hell Drinkers, Petti, Sara Zozaya.

Bestalde, Etxepare Euskal Instituaren Musika Sari berezia Korrontzi taldeak jaso du aurten, euskal musika nazioartera eramaten egin duen lanaren errekonozimendu gisa.

Halaber, EKE Euskal Kultur Erakundeak jaso du EHMBE Ohorezko Saria, Euskal Herriko musika-jardueraren inguruko sentsibilizazioan, hedapenean eta ekoizpenean egindako ekarpenagatik.

Sari banaketa Atabal aretoan izan zen atzo –maiatzak 19–, eta bertaratutakoek zuzeneko emanaldiez gozatzeko aukera izan zuten. Kategoria gabeko sariak dira honako hauek. Alegia, emandako sari guztiek dute balio bera: 2.000 euro eta Fernando Mikelarena artistaren garaikur bana.