Hilotz hirukote gipuzkoarrak disko berria, bigarrena, aurkeztuko du irailaren 15ean. 'Giza Ankerkeria' estreinako lanean bezala, oraingoan ere thrash, death eta black metal estiloak nahastuko dituen proposamena dakarte.
Baina bide berriak ere urratu dituzte: konposaketa ausartago eta luzeagoen alde egin dute eta lan berriak taldearen nortasuna finkatu du. Ekaitz Garmendia (Legen Beltza, Extinction, Sijjin) gitarjole eta ekoizle entzutetsuak egin ditu diskoaren grabaketa, nahasketa eta masterizazio lanak, Black Storm estudioetan (Karrantza).
11 abestik osatzen dute. Migratzaileak, emakumeak, animaliak, adikzioa duten pertsonak, gaitasun ezberdinak dituztenak… dira disko honetako protagonistetako batzuk. Tartean, galdera, desio eta zalantza asko.