2000 urtean argia ikusi zuen kanta mitiko baten soinua eguneratu eta jarraitzaileei opari gisa eskaini die Asgarth taldeak: Heriotzaren Aurpegia.
Donostiako Añorga auzoko taldeak gorriz markaturik zuen maiatza egutegian, Izan ere, hilaren 9an ematekoak ziren aurreneko itzulera-kontzertua, Añorgako zine zaharrean, duela hamahiru urte agur esan zuten leku berean.
Covid19ak eragindako aparteko egoerak, baina, planak eta datak aldatzera behartu ditu. Hortaz, itzulera-kontzertuaren ordez, eraberrituta pieza hau plazaratzea erabaki dute.
Heriotzaren Aurpegia abestiak 2000 urtean ikusi zuen argia, Etorkizunaren Sustraia izeneko bigarren diskoaren baitan. Berehala bilakatu zen zaleen kuttunetako bat. "Gogoa genuen duela bi hamarkada konposatu eta grabaturiko kanta berezi hau berreskuratzeko, abestia lehenengoz jaio zeneko une horiek beste behin ere bizitzeko. Ederra izan da doinuei bizi berri bat ematea", adierazi dute.