Fat White Family seikoteak bere estilo basati, kaotiko eta nihilistari ñabardura berriak gehitu dizkio Serfs Up! Hirugarren albumean: funk, krautrock, lounge... Kritika bikainak jaso dituzte The Quietus, Rockdelux eta The Irish Times moduko hedabideetan. Aurkezpen-bira sonatua egiten ari dira zinez, data gehiago iragarri dituzte berriki eta, tartean, bada Euskal Herrian egingo duten geldialdi bat: 2020ko otsailaren 2an Miarritzeko Atabal aretoan ariko dira zuzenean, eta sarrerak salgai daude jada.
Londres hegoaldeko Peckham auzkoko squat batean eratu zen taldea 2011n. Rock&rolla, post-punka, countrya nahiz psikodelia nahastuz, zuzeneko basati eta autodestruktiboei esker laster lortu zuten publikoa eta kritika poltsikoan sartzea. Brixton distrituan egonkortuta, 2013ko martxoan kaleratu zuten aurreneko grabaketa lana: Cream Of The Young. Lehen disko luzeak, ordea, bi hilabete geroago ikusi zuen argia: Champagne Holocaust, Trashmouth zigilupean. Hainbat single eta kontzertu gogoangarriren ostean, 2016an heldu zen bandaren bigarren diskoa, “aurrekoa baino are vitriolikoagoa”: Songs For Our Mothers, Without Consent zigilupean.
Eta azkenik, aurtengo apirilaren 19an iritsi zen orain aurkezten dabiltzan Serfs Up! Orain arteko bizio musikalak alboratuta, estilo-abanikoa zabaldu dute.