Ez da Ez

Itziar Ituño aktore bizkaitarra bidelagun hartuta, Ez da Ez kanta eta dagokion bideoklipa aurkeztu ditu Anne Etchegoyenek. 'La Manada' kasuaren harira otu zitzaion Etchegoyeni indarkeria sexista arbuiatzeko abesti hau idaztea, eta hiru hizkuntzatan grabatu du: euskaraz, gazteleraz eta frantsesez.

Emazte diskoaren parte da Ez da Ez kanta. Etchegoyenentzat lan “oso pertsonala” da Emazte, “emakumearen albuma”. Munduari zabalik bizi diren emakume euskaldunen irudia goraipatu nahi du eta parekidetasuna aldarrikatu. Aurkeztu berri duen abestian ere emakume askea, berdintasunean bizi dena, erakutsi nahi du.

Bide batez, bere 40. urtebetetzea ospatzeko ere balio dio disko honek. 10 kanta berri, bere unibertso folklorikora ekarrita. Egungo soinuak (gitarra elektrikoa adibidez), tradizionalekin (txalaparta adibidez) nahastuta.