Emadan diskoa aurkeztu berri du Eneritz Furyak musikariak, bere bakarkako garapena berrestera datorren hirugarren alea.
Duela hilabete sareratu zuen diskoaren izen bereko kantaren zati bat, eta duela astebete 'Sinkropredazioa' kantaren bideoa sareratu zuen. 2017an aurkeztu zuen kanta hori jendaurrean, Zumarraga-Urretxuko (Gipuzkoa) KKinzona irratiaren Sortu Dira Besteak jaialdian, eta disko berrian sartu du orain.
2017an argitaratu zuen bakarkako lehen diskoa Eneritz Dueso Domenechek, Kasernarat taldean aritu ondoren hartu zuen izena buru zuela: Eneritz Furyak. Urtebete geroago, 2018ko urrian, 'Zaldi zuria / Maskara' aurkeztu zuen.
Bi urte pasatxo joan dira ordutik. 10 abesti ondu ditu ‘Emadan’ osatzeko, aurrekoa baino lan “neurtuagoa”, bere hitzetan; post-folketik gertuagokoa.