Albaro eta Raul Arizaleta anaiak buru dituen El Columpio Asesino taldeak amaiera heldu dela iragarri du, bi hamarkada luzeko ibilbidearen bukaerara iritsi direla.
Agurra iragarri eta gutxira jakinarazi dute ‘Amarga Baja’ izeneko bira egingo dutela euren zaleekin azkeneko zuzenekoez gozatzeko. 1999az geroztiko ekarpen musikal zabala errepasatuko dutela ere adierazi dute.
Agur esateko kontzertu-sorta hori Bilboko Kafe Antzokian eta Donostiako Intxaurrondo Kultur Etxean abiatuko dute, irailaren 15ean eta 16an hurrenez hurren. Urriaren 6an Valentziatik pasatu ondoren, azaroaren 11n itzuliko dira Euskal Herrira: Gasteizko Jimmy Jazz aretoan ariko dira. Azken-azkena, baina, etxean jotzea aurreikusi dute: abenduaren 29an izango da, Iruñeko Zentral aretoan.
Gaur (otsailak 28) jarriko dituzte sarrera guztiak salgai osopolita.org webgunean, eta data berriak iragarriko dituztela aurreratu dute, Portugalen nahiz Latinoamerikan ere jo nahi dute eta.
El Columpio Asesinok rock, punk eta noise artean dantzan dabiltzan sei disko kaleratu ditu 2003an lehen lan homonimoa plazaratu zutenetik.