BideHuts kolektiboak uzta berritzaileak ekarri ohi ditu, eta proposamen hau ere “bide berriak zeharkatuz” ondu dute, “helmuga ezagunetara iritsiz”. 

Musika eta hitzak osatzeaz Ivan Zabalegi (Nire), Ander Zabalegi (Sacco), Borja Toval (Sacco, Lisabö), Borja Iglesias (InorenEroNi), Karlos Osinaga ‘Txap’ (Lisabö), Martxel Mariskal (Lisabö) eta Jon Rubio arduratu dira. Grabaketa, ordea, Txap-ek hartu du beregain.

Disko hau aurrekoa baino rockeroagoa eta intentsoagoa dela diote eurek, zakarragoa: “Basamortuaren eta euriaren erdibidekoa”. Neurri batean, zuzenekoari eta Cigar Box gitarraren erabilpenari esker lortu dute zapore hori, beti ere alt-countrya, bluesa eta americana alboratu gabe.