Xabi Bandinik eta bere taldeak lan berria aurkeztu dute: Biba!, energiaz beteriko elektro-pop zuzena, Pello Reparazek (DeepSoda) produzitua. Bandini, Alberto Isaba eta Lur Larraza hirukotearen beraren hitzetan, arnasten laguntzea da lan honen jaiotzetiko misioa: energiaz aurrerantz bultzatzea, inor atzean utzi gabe, “zoriontasuna ez baita irribarre huts bat”.
Diskoa osatzen duten abestiak 90eko hamarkadako rock soinu sintetikoekin nahasten dira. Ahotsek eta hitzek irudi zirraragarriak marrazten dituzte, sintetizadorez eta erritmo indartsuz besteriko musikak lagunduta. Aurrerapen modura, Bizipiztiak singlea aurkeztu dute.
Biba! honek Europaz hitz egiten du, planeta bizigarriez, Magallanesi buruz, adiskidetasunari buruz… errefuxiatuez eta ihes egin nahian itsasoan hiltzen direnez ere kantatzen du Bandinik.
Finean, diskoaren aurkezpen gutunak dioen moduan, “txio sinple batetik harago ikusi nahi ez dutenak deseroso jarriko dituzten kantak dira; beti bezala, maitasunaren eta itxaropenaren inguruko himno txikiak”.