“Kultura sustatzeko, agertokietara itzultzeko , erritmoa berreskuratzeko, sormena bultzatzeko eta zuzeneko arteekiko ilusioa partekatzeko” asmoz jarri zuen martxan Euskal Herriko Musika Bulego elkarteak Bes-Te-Bat! izeneko Zuzeneko Arteen Zirkuitua. Iragan azaroan abiatu zuten Euskadiko Antzoki Sarearen lankidetzarekin eta Eusko Jaurlaritzak finantzatuta, eta urte berriarekin jarraipena izango du beste bi hilabetez.
2021eko urtarrila eta otsaila bitarte, beste 157 emanaldi ahalbidetuko ditu ekimen honek, hainbat arte-diziplinatakoak, nahiz eta gehien-gehienak (%80) musika kontzertuak izango diren; horietatik %70, gainera, euskaraz. Izen aipagarrienen artean, honakoak: Olatz Salvador, Izaro, Liher, Nogen, Cobra, Anari, Aitor Etxebarria, Amorante, Eñaut Elorrieta, Belako...
Emanaldi guztiak zuzenekoak izango dira, artistak eta publikoa Bizkaiko, Arabako eta, batez ere, Gipuzkoako areto eta antzokietan berriro elkartzea baita egitarauaren xedea.
Zirkuituari buruzko informazio ofiziala eta agenda eguneratua www.beste-bat.eus webgunean daude ikusgai.