Kepa Junkerak euskal trikitia eta herri musika maila gorenera igo zituen, 30 disko baino gehiago argitaratuz eta 100 kolaborazio baino gehiago eginez, 40 urteko ibilbidean zehar. 2018an iktus batek aldendu zuen eszenatokietatik, eta geroztik errehabilitazio etengabean segitzen du.
Hain justu, ia dena berriro ikasteko prozesu horren gorabeherak jaso ditu Junkerak berak 'Berpiztu' liburuan. Hori, eta lau hamarkadatan utzitako ondarearen memoria. Gainera, sorkuntza ariketa kolektibo gisa ulertzen duenez, liburu horren osaketan parte hartzera gonbidatu ditu bere karrera profesionalean bidelagun izan dituen artista guztiak: poetak, idazleak, argazkilariak, margolariak, ilustratzaileak eta abar.
Liburu hori ardatz harturik, eta musikariarekin Oliene baserrian izandako topaketetan ere oinarriturik, Fermin Aio zuzendariak izen bereko film dokumentala ondu du. Barton Films-ek ekoitzia, Donostiako Zinemaldiaren testuinguruan estreinatu dute. GAinera, Kepa Junkerari Adarra Saria aitortu diote, eta bere senideek jaso dute.
Euskal Herrian, Katalunian, Galizian, Madrilen eta Portugalen errodatu dute dokumentala, eta udazkenean helduko da aretoetara.