Hizkuntza, kultura eta jatorri anitzeko artisten arteko kolaborazioak posible egiten dituen festibala da Atlantikaldia; urtero, irailean, Errenterian antolatzen duten zuzeneko sorta.
Aurtengo edizioa irailaren 24tik 26ra bitarte izango da eta, orotara, sei kontzertu izango dira hiru egunetan.
Lehen egunean, hilaren 24an –osteguna, 20:00tan–, La Yegros artista argentinarrak Ines Osinaga (Gose) igoko du agertokira.
Ostiraleko lehen kontzertuan (19:00), Guillem Roma kataluniarra Afrika Bibang algortarrarekin batera ariko da. Eta eguneko bigarren ekitaldian (21:30), Arat Kilo & Mamani Keita (Frantzia/Mali) Mad Muasel bilbotarrarekin eskuz esku ikusteko aukera izango da.
Larunbatean, berriz, hiru kontzertu berezi izango dira: eguerdian (12:00) Pedro Pastor kantautoreak Izaro gonbidatuko du eszenara. Iluntzean (19:00), Oum (Maroko/Frantzia) Alos Quartet laukotearekin arituko da. Eta eguneko azkenak (21:30), Che Sudaka taldea (Kolonbia/Argentina/Katalunia), Huntza taldeko Josune Arakistain, Uxue Amonarriz eta Aitor Huizi igoko ditu eszenatokira.