Alde batetik, Jupiter Jon gipuzkoarrek pospunka jatorri ezberdinetako doinu etnikoekin bateratzeko dute abilezia. Eta, bestetik, Zuberoako kopla zaharrak emakumezko ahots eztiz kantatzen dituen a capella folk taldea, Amaren Alabak. Bi musika unibertso ezberdin, batean.
Beñardo Goietxeren hitzetan, “musika bizitzeko bi molde desberdin, baina agerian denez, inola ere ez moldakaitz; bi muga mugaezinen artean, haize-hegoa eta ipar-haizea elkarrekin musikantuan”. bIDEhUTS kolektiboak berak “aurtengo harribitxi” gisa izendatu du cOUPAGE hau.
A ALDEAN:
XVIII. mendeko Beñat Mardo koplagile barkoxtarraren Barkoxeko gatü jaleen kantorea katu-jaleei buruzko bertsoen egokitzapena doinu exotikoz jantzia; Txinako folk musika kutsuko gitarra xaflak, Jamaikako dub aire beroekin nahasi, eta seikotearen bozak hegalean enara sorginduen pare.
B ALDEAN:
Manex Pagola kantari eta idazle baxenafarraren mamuak uxatzeko Zikilimarro haurrentzako kantaren moldaketa bat; sei ahotsen armiarma sareak Karibeko lounge eta Cap Vert-eko folk giroko pieza hipnotiko batekin bat eginik.
HIRUGARREN PIEZA BAT Saretik deskargatzeko aukera ere bada:
XIX. mendeko Plañu niz bihotzetik desamodio balada anonimoa, ohi baino biziago egokituta. Gwendalen gisako folk-rock doinu saltokari baten artean ahotsak arritmia kontrolatu batean dantzan.