Zuzeneko emanaldietarako abagunea ere eskaintzen du Dock Of The Bay jaialdiak. Dock Live! espazio interdisciplinar horren testuinguruan, Verde Prato eta Ainara Legardonen emanaldi bana programatu dute. Biak hala biak Kutxa Kultur Klubean izango dira.
Maiatzaren 5ean Ana Arsuaga ariko da. Bilboko Serpiente hirukoan ahotsa eta teklatu izandakoak Verde Prato egitasmoa du orain eskuartean. Instrumentazio elektronikoa lagun, ‘Kondaira Ere Hura’ diskoa atera du, besteak beste, Mutilaren Kanta, Lagunen Kanta, eta Neskaren Kanta abestiak bildu dituena.
Donostiako Musika Dokumentalen Jaialdiaren azken egunean, maiatzaren 7an, Ainara LeGardon igoko da oholtzara. ‘Res-cue. The archive in mouth’ hausnarketa eta reinterpretazio proiektuaren “eboluzio naturala” eszenaratuko du.