Asier Nazabalek eta Carolina Ruizek irabazi dute 49. Heineken Jazzaldiko Kartel Lehiaketa. Kartel irabazleak, Ciudad pianista (Hiri pianista) izenburukoa, 1.200 euroko saria jaso du.
Carolina Ruiz Cerdanyolakoa (Bartzelona) da jaiotzez, baina Hondarribian bizi da egun. Asier Donostian jaioa da eta bertan bizi da. Donostiako Usandizaga Institutuan ezagutu zuten elkar, Diseinu Graduko ikasle zirela. Iaz amaitu zituzten ikasketak. Ciudad pianista elkarrekin diseinatu duten lehen kartela da eta bientzat ere lehiaketa batera aurkezten diren lehen aldia.
Kartela Adobe Illustrator programaren Luma tresnarekin egindako bektoriala da. Egileek adierazi dutenez, Donostia identifikatzeko elementuen bila aritu ziren, baina topikoenak alboan utziz: Kontxa, Haizearen Orrazia. Eta horri, kartelaren behekaldean ageri diren teklak gehitu zizkioten, musika iradokitzeko asmoz.