entzun.eus

Musika albisteak
eta agenda astero
zure postontzian!


| Sindikatu - RSS | Testu tamaina AAA

Erreportajeak

bidali zure berria Bidali zure artikuluak
Rafa Cabeza 2002-11-06

UTIKAN Adio lagunak!

Agur guztiak ez direlako tristeak Agur guztiak ez direlako tristeak

Klikatu argazkien gainean handiago ikusteko
Utikanek azken kontzertua eman zuen joan den urriaren 5ean Donostiako Guardetxean. Taldearen betiko agurra izan zen, 15 urteko ibilbideari akabera eman ziona. Denbora guzti honetan hiru disko luze Utikan, Zurrunbiloan, Bidea argitaratu ditu Utikanek. Rafa Cabeza, gitarra-jole eta Entzunen kideak azken kontzertuaren kronika ekarri digu.
Lehen sentsazioak

Goizean genuen zita, hamaiketan, entseatzeko. Hau ez da ohikoa, ez pentsa, baina entsegu gutxi eginak genituenez, kontzertu honi begira entsegu jenerala burutu genuen. Bazkaria ere antolatu genuen auzoko tabernan, baina daukagun arriskua dela eta, botiletatik urrun mantentzeko promesa egin genuen.

Azken entsegua

Entsegua kristorena izan zen. Kontzertu txiki baten antzekoa. Jende asko hurbildu zen lokalera. Dena ondo atera zen. Horrek segurtasuna ematen dizu kontzerturako. Bibrazio onak nabaritzen ziren. Zerrendan kanta asko elkarrekin lotu genituen eta hori begiratu genuen batez ere. Normalean hiru ordu laurden jo izan ditugu. Denbora gutxi, baina beti topera. Oraingo zerrenda bi aldiz luzeagoa zen! Kanta zahar asko. Gustura entzuten ziren hainbeste denbora pasa eta gero. Hurbildutako lagunek tximak gustura astintzen zituzten. Baita guk ere.

Guardetxera

Txintxo bazkaldu eta gero, gauza arraroa gure kasuan, katxarroak hartu, furgonetan sartu eta Guardetxera abiatu ginen. Nolakoa izango ote da lokala? Horrelako galderak izaten ditut orduan buruan. Beti okerrena espero dut. Horrela ez dut txasko gehiegirik hartzen. Oraingo honetan baina, lokala kristorena zen. Txikia, polita, ondo hornitutako eszenatoki batekin, tabernatxo bat... Terrazatik Donostiako alde zaharra eta itsasoa ikusten ziren. Tuu matx!

Afaria

Soinua frogatu genuen. Captain Nemoko lagunekin barre batzuk egin eta afaltzera joan ginen. Sabelean urduritasuna sentitzen nuen. Lehenbiziko kontzertuan bezala. Ez zegoen gose handirik. Guardetxera itzuli ginen. Aspaldiko lagun asko topatu genuen. Baita Utikaneko partaide zaharrak ere. Eta nola ez, parranda askotan zehar ezagututako kamarada asko... Kaptain Nemo gustura entzun nuen. Karkaxa, Naun eta orain Captain Nemo... musikari handiak dira. Kontzertu oso ona eman zuten. Rock erakustaldi ederra. Autentikoa. Momentua hurbildu ahala ez nekien zer egin. Gora joan, behera bueltatu. Norbaitekin hitz egin. Trago bat hartu. Gora joan. Behera bueltatu...

Kontzertua

Eszenatokian, nerbioak berehala uxatzen dira. Beti bezala, taldeko lagunak besarkatu eta gora! Hasiera-hasieratik jendea gurekin sentitu genuen eta horrek dena ematera behartzen zaitu. Berehala hasi ginen serio izerditan. Edan eta segundora ateratzen zitzaizun izerdia kopetan behera. Iturri bat bezala. Bero asko zegoen. Lehenengo espontaneoak igotzen hasi ziren. Hasieran mikroari heltzen diote eta zortea baduzu ez duzu hortzetan kolpea hartuko. Gero lepotik harrapatzen zaituztete eta azkenean mikro horretatik ihes egin beharrean aurkitzen zara. Momentu bikainak dira! Kontzertua aurrera joan ahala, zerrenda luze horrek amaigabea zirudien. Adio lagunak! Mila aldiz izan nituen kontzertuari buruzko gogoetak. Zer sentituko dut kanta hau edo beste hau azkeneko aldiz jotzerakoan? Baina azkenean beti egin duzuna egiten duzu soilik. Gehiegi pentsatzeko astirik gabe. Goian ez dago ez etorkizunik ez iraganik. Momentua besterik ez. Segundoa bizi behar da. Amaiera iritsi zen. Gitarra zeruraino altxatu eta jende guztiak besoak altxatuz erantzun zuen. Beste momentu errepika ezina! Leher eginda bukatu genuen. Entzefalograma laua. Utikanen azken kontzertua izan zen, baina oraindik azken parranda falta zen. Zoritxarrez, hau kontatzeko beste ale bat beharko nuke... Adio lagunak

2002-03, ABENDUA - URTARRILA
bidali zure artikulua Bidali zure artikulua
Bidali zure iruzkina


kaptxa

bai, ezagutzen dut datuen erabilpen politika eta onartu.

bai, entzunen buletina astero jaso nahi dut.