entzun.eus

Musika albisteak
eta agenda astero
zure postontzian!


| Sindikatu - RSS | Testu tamaina AAA

Erreportajeak

bidali zure berria Bidali zure artikuluak
Asier Leoz 2012-07-12

THE ROLLING STONES galdutako harri bitxiak

Beren lehen kontzertuaren 50. urteurrenean, abesti "bitxi" batzuk ekarri ditugu gogora

Rolling tongue Rolling tongue
Licks Live Tour. Estatu Batuetako edozein tokitan, Jagger-ek jendeari zein kantu entzun nahi duen galdetzen dio. Keith Richards eskatutako kantua jotzen hasten da. Lehenengo akordea, bigarrena... eta kito. Ahaztuta dauka nola jarraitzen duen. Ez da harritzekoa. Inoiz izan den talderik handienak ehunka abesti dauzka eta haietako gehienak ez ditu zuzenekoetan egiten. Bidean gelditu diren harriak dira. Hona hemen batzuk.
As Tears Go By (1966) Leihotik begira. Malkoak, hutsunea... eta Marianne. Udazkena Jagger-en bihotzean.
Around and around (1964)
Chuck Berry maisuari hartutakoa. Garai hartan Brian Jones zen benetako burua.
Blue turns to grey (1966)
The Rolling Stones pop talde bat? Zalantzarik ez, onena gainera.
Cocksucker blues (1970)
Bere garaian iskanbila izan zen, baina ez zen hainbesterako. Jagger gaztetxoak Leicester Square-ko polizia bati hainbat jolas proposatzen dizkio daraman porra erabiliaz.
Country Honk (1969)
Honky Tonk Women guztiek kapela jantzi eta rodeorako bidea hartzen dute. Country-ak ere ez dauka sekreturik The Rolling Stones-entzat. Doo Doo Doo Doo Doo Doo (Heartbreaker) (1973) Zaila da Angie-ren disko berean bizitzea, baina kantu hau rock ariketa bikaina da. Kolorea metalek ematen dute.
Dead Flowers (1971)
Jagger & Co Gram Parsons errepidean barrena, ziztu bizian. Countrya eta rock nrolla. Abesti honek, berak bakarrik, bi estiloei eragin zien.
Emotional Rescue (1980)
Oh yeah! Funk!!! Nortzuk dira hauek? Bee Gees? Disco olatuari aurre egiteko gauza izan ziren Jagger eta bereak. Emotional rescue, Miss you...
Factory Girl (1968)
Stones eta Warhol. Azken honen festa eroetan ohikoak ziren Jagger eta lagunak. Nico, esate baterako, Faktory-ko nesketako bat, bertan ezagutu zuten.
Faraway eyes (1978)
MC Jagger-ek kantatu baino kontatu egiten du abesti hau. Dobro eta pedal steel doinu artean narratzaileak dimentsio berri bat ematen dio country-ari. Azpitik, noski, maitasuna galdu aurreko instantea.
Fool to cry (1976)
Black & Blue diskoak ez zion orokorrean Stones mailari eusten, baina abesti goxo hau utzi zigun.
Gimme Shelter (1969)
Mundu guztia belauniko. Soul + Funk + Gospel batera. Denok behar dugu babesa.
Hitch-Hike (1965)
Jagger & Co poltsa bizkar gainean eta dedo egiten. Espaloi ingelesa edo amerikarra?
I Got the Blues (1971)
Jakina dutela! Time is on my side Soul bada, I got the blues-en ondoan Blues jarri, asmatuko duzu.
Im Free (1966)
Zoragarria. Aske naiz nahi dudana egiteko. 95eko Stripped akustikoan bertsioa gaindituko zuten.
Just My Imagination (1978)
Mick Jagger beltza da. Ez al zenekien? The Temptations-en klasikoaren bertsioa.
Let it bleed (1969)
Brian Jones-en heriotza kolpe latza izan zen. Zauria irekita, arnas hartu dezan, odola aske isurtzen da eta The Rolling Stones talderik handiena bilakatzen da.
Love in Vain (1969)
Blues-ak mina ematen duenean, ondo egina dagoen seinale. Geltokian bakarrik, maleta eskuetan. Denok sentitu gara noizbait horrela.
Miss Amanda Jones (1967)
Leihoa zabalik gelditu da eta Dylan sartu da. Gutxietsitako Between the buttons laneko une ederrenetako bat.
No Expectations (1968)
Blues-a, hori bai, euren erara.
Out of tears (1994)
Baladoi bat. Stones bizirik 1994an? Ilusio bat baino ez zen izango.
Out of time (1966)
Abandonatutakoak gidaritza hartzen du: Nire neska gaixoa, orain ezin duzu itzuli eta zerrendako lehena izan berriz, garaiz kanpo zabiltza
Parachute Woman (1968)
Rythm & Blues gihartsua. Jagger-ek zerura begiratzerakoan bere gainera datozen neskak baino ez ditu ikusten, jausgailua eta guzti. Kantatu al dio inoiz beste norbaitek tresna horri?
She Said Yeah (1966)
Stones basatiak aske, garaje gordina. Minutu terdi baino ez, disko oso batek adina balio duena.
Sister Morphine (1971)
Berriz ere Faithfull anderea (berak idatzia da). Drogak eta gaindosiak. Denek, beraiek eta berak, asko dakite gaiari buruz.
Sing This All Together (1967)
Stones festa gogoarekin (bertsio laburra, mesedez). Klasiko bat.
Some girls (1978)
Mick Jagger, sex-symbol estutua: Neska batzuk larrua jo nahi dute egun osoan, nik ez daukat hainbesterentzat hazia.
Stray Cat Blues (1968)
Dekadentzia stoniarra eta Jagger lizuna eskolako atarian. Badakit 15 urte dituzula, baina espero dut zure amak ez jakitea horrela garrasi egiten duzula.
Street Fighting Man (1968)
Stones politikoak. Sinetsi al dezakezu? Kantuak 68ko maiatza frantsesa dauka oinarri.
Stupid Girl (1966)
Jones-en ikuspegi irekiak bultzatuta, taldeak sitar doinuak sartzen ditu Aftermath diskoan eta mundu guztia mendebaldeko kostaldera begira. Flower-Power garaiak datoz...
Sweet Virginia (1972)
Tarte honetan Exile On Main Street-eko 18 kantuetatik edozein jar dezakezu, edo hobe oraindik, guztiak. All down the line, Casino Boogie... Stones bere momenturik onenean. Ohiko pokerra (rock nroll, soul, blues, country) esku koipetsuekin jokatua.
The Singer Not the Song (1966)
Bi minutu eta hogeitazortzi segundo inbertitzeko modurik onena. Borobila.
The worst (1994)
Ez al da azken hamarkadako ezer salbatzen? Ba tamalez, gutxi. Balada eder hau (Voodoo Lounge, 94) berez 1971 urtean idatzia zen.
Under My Thumb (1966)
Aspaldi honetan baztertuta, klasiko handi honek Stones-en kontzertuak zabaltzen zituen orain hogei urte.
Whos Been Sleeping Here? (1967)
Izenburu ederra, ezta? Esaidazu neska, itsasgizonak, soldaduak, hiru mosketeroek, zeinek lo egin du hemen?. Erromantizismoa Stones klabean.
Worried about you (1981)
Tatoo you diskotik ezaguna egin ez den bakarrenetakoa. Eskolan ikasitako rock moteldua. Mick faltsetea berrasmatzen eta Ron Wood guitar-hero paperean. Richards, itzalean. Ederra.
You Better Move On (1966)
Arthur Alexanderren bertsio bat. Benetan polita.
You Got the Silver (1969)
Keith Richards edo nola bihurtu desafinatzea bertute. Bikaina.
You Gotta Move (1971)
Blues geldoa, Sam Cooke-n eskuek gatzatua, Stones izerdian blai. Aipatzekoa Love You Live zuzenekoan dagoen aldaera.

2003, EKAINA - UZTAILA
bidali zure artikulua Bidali zure artikulua
Bidali zure iruzkina


kaptxa

bai, ezagutzen dut datuen erabilpen politika eta onartu.

bai, entzunen buletina astero jaso nahi dut.