2001. urteko udaran Hondarribian eman zuen kontzertu paregabean ezagutu genuen Faraco, Ciranda estreinako diskoa aurkezten ari zela. Iazko udazkenean Interior lana plazaratu zuen, bere bossa xalo eta dotorea hobetzen duen kanta sorta. Brasildar deserriratu honek benetako musikari batek eduki behar dituen lau dohain nagusiak erakusten dizkigu: konposatzaile fina, gitarra-jole abila, hitzetan konplexutasuna eta kantaera sentikor zein berezkoa.