Andoaingo Bap!! taldea gogora ekartzeko ez da aitzakiarik behar: argitaratu zituzten hiru diskoetako bat jarri eta trumilka datozkigu oroitzapenak, sentsazioak, irudiak. Oso ondo pasatu genuen Bap!!-i esker, bai horixe! Beste garai batzuk ziren haiek, Euskal Herrian beste zerbait, geure-geurea eta boterearen morrontzatik askea, eraikitzen ari ginen, eta ilusioak eta gogoak gainezka egiten ziguten. Kontsumoak berarekin dakar atzokoa zaborretara bota eta gaur beste zerbait erosi beharra, modak izugarrizko abiadaz aldatzen dira, eta gaurko musikazale gazteentzat, zoritxarrez, Bap!! izen ezezagun samarra delakoan nago. Metakek berriki kaleratu duen Bazen izeneko DVDak egoera hori aldatuko ahal du!
DVDak taldearen ikuspegi nahiko osatua ematen digu. Bertan ...ta bestela ondo bideoan agertzen ziren klipak berreskuratu dituzte, Bap!!-ek eman zuen azken kontzertua ere han agertzen da, eta, gainera, 1986ko lehenengo maketa sartu dute. Drakek (taldeko gitarra jolea, bigarren diskotik aurrera baxua jotzera igaro zena) gogoan ditu garai hartako gorabeherak: