Ez da jauzi makala izan. Duela 40 urte galtzear zen txalaparta. Orain berriz, hainbat lagunen lanari esker, agian inoizko sasoirik onenean dagoela esaten ahal dugu.

Lehen estazioa: hastapenak

Nondik dator txalaparta, baina? Ez dago argi jakiterik, baina hipotesi bat baino gehiago entzun dugu bere inguruan. Sarri esan da antzinako euskaldunek elkarrekin komunikatzeko erabiltzen zuten tresna zela. Ikerketek ordea, bestelako mugetara garamatzate. Hauek, auzolanen ondorengo jai giroan kokatzen dute musika tresna. Adibidez, sagar jotzearen ondoren festa antolatzen zen. Lanean aritutakoak afalostean berotzen zirelarik txalaparta prestatu, jotzen hasi eta lagun gehiago biltzen zen festara.
Juan Mari Beltran herri musikaren ikertzaileak hori dio, txalaparta garai bateko lanekin lotura estua duela.